КОМПОСТИРАЊЕ
Зборуваме за најстариот, но и најприроден начин на рециклирање на органската материја. Компостирањето е процес на биодеградација- контролирано биолошко разградување на органските материи содржани во органскиот отпад (зеленчук, овошје и сл.), измешан со кафена маса (суви лисја, гранки и сл.) и градинарска земја во присуство на кислород, микроорганизми и доволна влажност. Процес на повторна употреба на остатоците од храна и отпадот од дворот за производство на ѓубриво. Не случајно се вели дека компостирањето го претвора отпадот во „црно злато“. Како процес управуван од човекот, всушност, компостирањето е забрзување на начинот на кој природата рециклира. По компостирањето ќе добиете природен хумус кој може да го користите како природно ѓубриво за садење на најразлични растенија.
❗Зошто е потребно да се компостира?
При гниењето на органските материи се испуштаат штетни по здравјето гасови како метан и јаглероден диоксид, кои се главните виновници за глобалното затоплување и климатските промени.
За да помогнеме во намалувањето на емисијата на овие гасови, крајно време е секој еден од нас да размислува како сам да го компостира отпадот.
Што можеме да компостираме?
- биолошки отпадоци од домаќинството (остатоци од овошје и зеленчук, лушпа од јајце, талог од кафе, вреќички од чај, остатоци од леб),
- градинарски и зелен отпад ( лисја, овенати цвеќиња, искосена трева),
- останат био отпад (кора од дрвја, хартија и картон).
Што не може да се компостира?
- течни остатоци од варена храна,
- месо, риба, коски, кожа,
- млечни производи, масла и масти,
- болни/изгниени растенија, пепел, амбалажа, гума,
- обоен и лакиран дрвен отпад,
- обоена хартија,
- облека,цигари и сл.
Некои од придобивките од компостирањето се:
- балансирање на pH вредноста на почвата,
- ги прави хранливите материи во почвата полесно достапни за растенијата,
- привлекува дождовни црви, сметани за „најголемите рециклирачи на земјата“.
- ја подобрува способноста на песочните почви да држат влага и да се спротивставуваат на ерозијата,
- ја зголемува содржината на витамини и минерали во храната што се одгледува во градина богата со компост,
- ја намалува зависноста од нафтени ѓубрива.
Конечно, штедиме пари. Компостот е квалитетно органско ѓубриво кое е потполно бесплатно. И секако најважната причина која треба да биде и најголемиот потикнувач, е тоа што ги штитиме околината и доброто здравје.
